Lenong siang ini dimainkan oleh
1.Didut
2.Ipeh
3.Zewe : sbg Babeh
Cerita dimule:
"Bang, kita nih pacaran kan udah lama. Udah ampir 3 taonan," kata Ipeh kepada Didut, pacarnya.
" Iye Peh, sekitar segitu deh. Emang kenape, lu udeh bosen pacaran ame gue?" ujar Didut.
"Yaa.. ga gitu sih, cuma aye mo nanya, abang serius ga sih ame aye," kata Ipeh.
"Serius gimane maksudnye Peh?" tanya Didut, belaga pilon.
"Yee.. aa.bang.. maksudnye abang serius mo nikahin aye, ape cuma mo pacaran doang," kata Ipeh rada kesel.
"Ya ngga lah Peh. Abang juga pengen nikahin Ipeh, tapi ga sekarang, ntar kalo duit abang udeh bejibun, baru deh abang ngelamar Ipeh," kata Didut.
"Yaaa... kelamaan bang, lah abang aje kerjaannye nadang doang ame babe abang, gimane ngumpulnye..." Ipeh mule tambah kesel.
"Nah tu, pan lu tau sendiri, abang ude kesono kemari nyari kerjaan, ga dapet2. Ampe lecek ijazah abang dipotokopi berkali2." kata didut sembari curhat.
"Abis gimane dong bang, nyak ame babe aye udeh nanyain terus tuh," kata ipeh.
"Yee... gimane dong peh?" Kata didut balik nanya.
"Jiaaaah... abang malah balik nanya," ujar ipeh.
"Begini aje deh bang. Ntar kalo ada yang ngelamar ipeh, abang ikhlasin ye. Abang jangan marah," kata ipeh lagi.
"Yaaaah... ko gitu peh... Jadi ipeh mutusin abang?" Didut rada kecewa.
"Abis gimane bang, ipeh sih ga mao mutusin abang. Tapi nyak ame babe bilang kalo abang ga bisa ngelamar aye minggu ini, babe mao nerima cowok laen yang ngelamar aye," kata ipeh.
"Emangnye ade yang mao ame lu peh?" Tanya didut sambil mesem, rada ngeremehin ipeh. Didut pikir cuma ia doang yang demen ame ipeh.
"Yee... ade lah bang. Emangnye abang aje yang demen ame ipeh. Asal abang tau ye, minggu kemaren tuh cowok dateng mao ngelamar ipeh. Tapi babe belon nerima lamarannye, babe ngasih kesempatan buat aye negesin ke abang," jelas ipeh, bikin didut rada seneng, ngerasa di perluin.
lanjut dibawe yee---»